حابب تعرف اكتر عن ال CRM ؟ عندك اسئلة كتير جوه عقلك وبتدور لها على إجابات ؟ يعنى ايه CRM وايه فوايده واسئلة تانية كتير هتلاقى اجاباتها في صورة مقالات متتالية …. يلا بينا نبدأ اولهم …..

CRM اختصار Customer Relationship Management يعني ببساطه ادارة علاقات العملاء والمقصود هنا العملاء الحاليين وكمان المحتملين للشركة.

يعتبر العملاء اهم اصول الشركات ولأن العلاقة بين الشركة وعملائها متشابكة وبتم عن طريق أقسام كتير زي قسم التسويق وقسم المبيعات وخدمة العملاء ومن خلال قنوات اتصال كتير زي الايميلات والمقابلات الشخصية والمكالمات التليفونيه ده كله بيخلي الوصول لمعلومات كاملة ودقيقة عن العميل صعب وبنضيع وقت كبير عشان نوصل لمعلومات واضحة ومفصله .. وده طبعا بيأثر  على أداء الشركة .

من هنا بدأت فكرة ان معلومات العملاء تكون موجودة فى مكان واحد منظم Centralized موجود فيه كل المعلومات مش بس عن العملاء الحاليين لا وكمان العملاء المحتملين واي حد الشركة حاولت تتواصل معاه بأي شكل من الأشكال. ولأن البيانات كلها بقت متخزنه في مكان واحد اللي هو الـ CRM فبالتالي نقدر نحللها بشكل أبسط وأسرع فنزود المبيعات ونزود درجة رضا العميل عن الخدمة أو المنتج بتاعنا.

لو إجابة سؤال واحد أو أكثر من الاسئلة دى بنعم يبقى احتمالية استفادتك من الـ CRM كبيرة جدا

• حاسس ان صعب توصل لكل البيانات الخاصة بعميل معين لانها متوزعة بين اقسام كتير؟
• حاسس ان صعب توصل لبيانات عميل معين لانها متوزعه في اماكن كتير زي الايميلات والـ excel sheets وجزء منها مش موجود خالص لانه كلام اتقال في ميتنج أو على التليفون؟
• بتسمع سؤال احنا وصلنا لفين مع العميل الفلاني ده كتير ؟ والاجابه عليه بتاخد وقت
• بتخسر عملاء بسبب ان متعملش عليهم Follow up ؟
• لو واحد من الفريق بتاعك اخد اجازه أو مشي حاسس ان في جزء كبير من معلومات العملاء اللي بيتابعهم هيختفي معاه ؟
• هل محتاج tools تفهم بيها اكتر انتاجية فريق المبيعات؟

أخيرا رغم أن الشركة ممكن تقدر تستمر لفترة من الوقت من غير CRM بس الاكيد انها هتوصل للحظة هتكون فيها محتاجه لنظام واضح وقوي بيـ manage علاقتها بالعملاء .. المشكله انها لما بتكتشف ده بتكون فعليا خسرت عدد كبير من العملاء المحتملين نتيجة عدم التنظيم وسوء المتابعة. نصيحتنا أن الأحسن متستناش لحد ما توصل للنقطة دي، بمجرد ما يكون عندك فريق مبيعات خليك متأكد ان ده الوقت المناسب عشان تاخد اول خطوة ناحية عالم الـ CRM